У Стоўбцах прайшла экалагічная акцыя «Падкормім птушак»

На беразе ракі Альхоўкі юныя паляўнічыя і рыбаловы, вучні пятых класаў  СШ № 2 г. Стоўбцы, разам са сваім педагогам Юрыем Лапкоўскім размясцілі кармушкі, якія змайстравалі ўласнымі рукамі з бацькамі, а таксама на ўроках працоўнага навучання.

  

Прынеслі і шмат корму для качак і драздоў, снегіроў, свірысцеляў, што жывуць у гэтых мясцінах. У кожнага з дзяцей былі вядзёрцы і кантэйнеры з крупамі і дамашняй кашай.

Раённая арганізацыйная структура Беларускага таварыства паляўнічых і рыбаловаў дапамагла са збожжаадходамі.

Непасрэдны ўдзел у акцыі прынялі яе арганізатары — супрацоўнікі раённай інспекцыі прыродных рэсурсаў і аховы навакольнага асяроддзя.

«Заклікаем усіх жыхароў горада далучацца і дапамагаць птушкам  перажыць халодную пару, — звяртае ўвагу начальнік райінспекцыі Аляксандр Сарока.  — У кармушкі можна насыпаць розныя крупы ў сухім выглядзе. Птушкі будуць рады і несалёным семкам сланечніка».

Грамадскі эколаг Іосіф Грыгарцэвіч жыве побач з гарадскім возерам, ён і быў адным з ініцыятараў гэтай акцыі. Іосіф Іосіфавіч паабяцаў, што будзе адсочваць абстаноўку і своечасова сігналізаваць аб неабходнасці чарговай падкормкі птушак.

А качкі, як толькі пачулі галасы і шум, зрабілі нечаканае «фыр» — гучнай чарадой адляцелі на іншы бок рачулкі.